Vestrænar konur geta ekki setið á hækjum sér

Þau eru mörg rannsóknarefnin.
Þessi frétt er inni á mbl.is:

Rannsókn sem miðaði að því að finna hina fullkomnu stellingu fyrir konur til að pissa fór út um þúfur vegna þess að þegar á reyndi voru vestrænar konur ófærar um að sitja á hækjum sér nógu lengi.
Frá þessu greinir fréttavefurinn Ananova.com og hefur eftir ástralska blaðinu The Australian.
Rannsóknin var gerð í Ástralíu og ætlunin var að bera saman vestræna salernisstellingu og hækjusetustellingu sem víða tíðkast í þriðja heiminum.
En í ljós kom, að vestrænar konur sem tóku þátt í rannsókninni gátu ekki setið á hækjum sér lengur en í hálfa mínútu án þess að detta.
Í rannsókninni var leitast við að safna upplýsingum um þætti á borð við hversu hratt þátttakendur gætu pissað, hámarkshraða, meðalhraða, hversu langan tíma tók að ná hámarkshraða og hversu mikið var pissað.

Já, stelpur mínar, kannski eigum við þeim konum sem tóku þátt, það að þakka að þurfa ekki að húka yfir gati í hvert skipti sem við þurfum að létta á okkur í framtíðinni. Mikið er ég þeim þakklát.

HJÁLP

Og nú er komið að ykkur, sem eruð betri en ég í ensku, (og það eruð þið öll) að upplýsa mig...
HVAÐ ÞÝÐIR ÞESSI SETNING: Phenomenological, ethnographic, hermeneutic analysis and interpretation; analyze elements of teaching episodes.

Útvarp Reykjavík...

...klukkan er 8, nú verða sagðar fréttir.
Alveg er dásamlegt að vakna við gömlu Gufuna - alltaf svona fastur punktur í tilverunni - og það gerði ég sem sagt í morgun eins og aðra daga og fékk þá strax tilefni til nýs íslenskupistils - Veit að það gleður ykkur ósegjanlega :)

En það var sem sagt frétt um annríki lögreglunnar í nótt. Margir í bænum og svona eins og gengur, og síðan sagt að nú væri orðið rólegt þar sem nátthrafnarnir hefðu tínst til síns heima í morgunsárið.
Það er reyndar ferlega skemmtileg mynd sem felst í þessari nýju samsetningu - Maður sér fyrir sér morgunroða - viðkvæma rómantíska stund eins og und -(Er ég ekki skáldleg??). Og kannski er bara allt í lagi að orð taki svona breytingum en til að upplýsa þá lesendur sem ekki vissu þá á þetta að vera morguns-árið þ.e. árla morguns.

Ísraelar tannbursta sig af ástríðu!!

Þórarinn Eldjárn rifjaði það upp í þættinum hjá Gísla Marteini áðan að einn menntaskólakennaranna hans hefði ekki viljað að sagt væri Ísraelar um Ísraelsmenn sem hann sagði að ætti að nefna svo, eins og í Biblíunni.

Skrítið hvernig svona einstök atriði sem kennarar hafa nefnt á árum áður sitja í manni alla tíð. Mér varð hugsað til Stulla, íslenskukennara í Réttó, sem ég hélt mikið upp á en hann þoldi ekki ef einhver talaði um að tannbursta sig. Spurði hvort við hárburstuðum okkur líka og vildi að við töluðum um að bursta tennurnar. Nokkuð sem ég hef haft í hávegum síðan þ.e. bæði að bursta tennurnar og nefna það þannig.

Hvað ætli þessir lærifeður segi þegar þeir hlusta á auglýsinguna frá Ora sem var áðan í sjónvarpinu þar sem talað er um 'að matseld sé ástríða' með áherslu á ást þ.e. ást-ríða og jaðrar við að verða kynferðislegt (enda er auglýsingin þannig) í staðinn fyrir á-stríða.

Kannski að ég taki bara upp pistla um íslenskt mál hér á síðunni minni ykkur til ánægju og yndisauka :)

Sátt

Hímdi hér á ullarsokkum og flónelsnáttbuxum með skjálfta í beinum þegar fyrsta skólaverkefnið datt loksins inn um lúguna eftir yfirlestur lærifeðranna í KHÍ og svei mér þá ef skjálftinn rénaði ekki um helming við sendinguna. Ég er sátt - já svei mér þá, bara mjög sátt :)

Og börnin fá viku í skólanum og ég er sátt við það líka og vona að kennararnir séu líka sáttir.
Yrðum við ekki sátt við það??

Nú er ég hætt að skilja...

Hópur krakka í æfingabúðum einhverrar blásturssveitar mátti ekki gista í skólastofum um helgina þar sem það flokkaðist sem verkfallsbrot en svo fer kennarahópur heils skóla í námsferð til útlanda og það er ekki verkfallsbrot!
Hvernig á maður að skilja þetta???

Lágnætti

Upplifði dásamlegt lágnætti núna kl. 4 í dag. Á áreiðanlega eftir að skapa lágnættisstemningu með þessum diski oft, oft þegar sálin kallar á trega og ljúfar nótur (sem er oft).
Takk Jóhanna, fyrir að hafa alltaf lag á að syngja þig alveg inn að innstu sálarkimum.

Fæ hroll...

... Mbl.is segir frá því að tveir íslenskir friðargæsluliðar hafi særst í Kabúl. Úff og þangað er hann Óli 'okkar' að fara í febrúar einmitt í sömu erindagjörðum. Vildi að ég hefði vald til að kyrrsetja hann hér heima.

Músabani

Ég gerðist músabani í æfingabúðunum um helgina. Já, maður er ekki alltaf samkvæmur sjálfum sér; einn veturinn fóðraði ég músarræfil hér fyrir utan hjá mér heilan vetur og hafði gaman af að fylgjast með henni - allt þangað til fjölskyldan hafði stækkað full mikið hjá henni, undir vorið. En svo sá ég þessa mús undir rúmi í bústaðnum á föstudaginn og var ekki róleg fyrr en hún lá dauð í gildrunni. Æ, það er fjandakornið ekki aðlaðandi hugmynd að vita af mús á stjái innan um dótið manns. Lái mér hver sem vill.

Annars glimrandi æfingabúðir og lögin eitthvað svo dásamleg að þessu sinni. Sammála því sem Fríða sagði um að þessi lög liggi einhvern vegin svo nærri manni að þau renni bara áreynslulaust inn.

Stólaskipti...

...hjá léttunum í gær og ég búin að skila af mér mínu litla hlutverki. Nú er bara að njóta þess að láta að stjórn.

Sat á skólabekknum bæði föstudag og laugardag og skemmti mér vel þó kennararnir færu svolítið út um víðan völl að þessu sinni. Alltaf erfitt að fylgja fólki þegar það fer svona út og suður en hópurinn er mjög góður - margt skeleggra einstaklinga, reyndra skólastjóra o.þ.u.l. og maður hugsar: "Úbbs, á ég samleið hér??" En ég náði að skila verkefninu af mér og það var mikið gott, svo er bara að sjá hvernig útkoman verður. Framundan er hins vegar þyngri róður en hingað til svo væntanlega verður manni best að halda vel á spöðunum. (Broskall) Úff, og æfingabúðir um næstu helgi!!!!!

Hugsa reynda stundum: "Hvern andsk... ertu að þenja þig þetta gamla mín?" og finnst ég svolítið vera búin að binda mig á klafa næstu misserin. Áhugaverðar stöður eru auglýstar - ein síðast í dag - en ég verð að láta þær framhjá mér fara ef ég ætla að halda þessu námi til streitu. Líka óþolandi fyrir Hof ef ég er alltaf á leiðinni þaðan út en hangi svo samt alltaf inni. Staðan er svolítið svona að þær losna ekki við mig af því að bossarnir vilja mann ekki sem stjóra. Asskoti leiðinleg staða satt að segja.

En eftir að skóla lauk í gær hef ég þó notið þess að gera ekkert af viti annað en að vera til og njóta samvista við skemmtilegt fólk. Fékk í heimsókn sérlega góða vinkonu mína sem gisti hér í nótt. Vinkonan heitir Berta og er 6 ára - er dóttir samstarfskonu minnar og var á deildinni hjá mér í fyrra. Veit ekki hvor naut heimsóknarinnar meira en alltént veit ég að þegar ég verð amma verð ég að æfa mig í að segja nei. Eða nei annars, maður bara nýtur þess að segja já við ýmsum óskum og dekrar bara við ungviðið - Lætur foreldrunum eftir að nota neiin og vera skynsamir. - Verð sjálf búin með þann pakka að mestu leyti þegar þar að kemur, eða það vona ég.

Jibbíkóla

Jæja, loksins er ég farin að sjá fyrir endann á þessu fyrsta verkefni í skólanum. Ótrúlegur tími sem hefur farið í þetta sem manni fannst allt liggja í augum uppi þegar það var lagt fyrir. En svona er þetta, stundum fer maður í marga hringi og það getur verið erfitt að velja og hafna því sem á að skila inn, sérstaklega þegar plássið er naumt skammtað.
Ég næ nú ekki að lesa allt sem farið verður í um helgina í staðbundnu lotunni en það verður að hafa það. Verð að venja mig á smá kæruleysi í bland.

En nú er að loka bæði skruddunum og tölvunni og reyna að njóta þessa dásamlega haustveðurs.
Eg elska haustið - hef alltaf litið á mig sem haustbarn. Elska þessa liti, ferskt kalt loftið og finnst rökkrið oft notalegt.
Kannski að ég stingi aðeins út trýninu áður en ég storma á foreldrafund á Hofi.

Ætli leikskólinn losni nokkurn tíma við þessa kvöld- og síðdegisfundi sem leggjst ofan á daglegu vinnuna??

Skipulags- námskeiðsdagur í vinnunni í gær þar m viðfórum í jóga eftir hádegi. Það var dásamlegt að teygja sig, fetta og bretta aftur. Var spennt að sjá hvernig handleggur og háls myndu bregðast við þessu þar sem hann hefur verið að minna svolítið á sig síðustu daga. Kannski myndi það bara gera mér gott að takast aftur á við jógað. Það er eitthvað við þessar æfingar og einbeitinu sem mér finnst alveg æði.

Eftir vinnu fór ég í smá teiti til að samfagna nýjum hæstaréttardómara.
Finnst ótrúlegt að fylgjast með fólki, t.d. á bloggsíðum sem úthúðar Jóni Steinari án þess að hafa hugmynd um þann mann sem hann hefur að geyma. Við sem þekkjum hann vitum að hann er heiðarlegasti maður sem hægt er að hugsa sér og vílar aldrei fyrir sér að taka upp málstað þeirra sem honum finnst brotið á; fer aldrei í manngreinarálit og meðhöndlar samherja og andstæðinga (ef hægt er að taka svo til orða) á algjörlega sömu forsendum.
En ekki orð um þetta meir - öllum er auðvitað frjálst að taka undir klisjur og samsæriskenningar sem eru mjög í tísku núna þótt fólk þekki hvorki til manna né málefna.

Nú svo er gamla konan (tengdó) flutt eftir langan aðdraganda. Fékk góðar móttökur og virðist ætla að una sér vel. Auðvitað slæmt að þurfa að flytja á sama tíma og hún er að glíma við bakverki og vanlíðan en ég held samt að þetta verði betra fyrir hana.
Kíki á hana í dag þegar ég hef klórað eitthvað meira í verkefnið sem vofir yfir mér þessa dagana.
Best að koma sér að verki - yfir og út!